شهادات حول الحرب النفسية التي يخوضها سكان شمالي غزة بعد حرمانهم من شبكات الاتصال والتواصل
هذه شهادات فلسطينيين من شمال غزة حول معاناتهم جراء قطع الاحتلال للاتصالات والانترنت عن قطاع غزة، نقلتها قناة الجزيرة مباشر ونشرتها في تاريخ 10 يناير 2024، وهذا نقل لشهاداتهم كما وردت:
سعاد التتري:
مفيش اتصالات، الكهرب مقطوع، المية مقطوعة، النت مقطوع، بدي أطمئن عليهم يطمئنوا عليا، مش قادرين نتواصل معهم. نناشد المسؤولين يساعدونا ويرجعوا النت. اطلعوا، شوفوا الناس كيف في المستشفى اليمني، كلهم بيدوروا على النت، وهاي كل الشباب قلقانين على قرايبهم، على أولادهم وأبنائهم، من قبل الظهر وأنا بحاول أتواصل مع أخويا، لحتى الآن مش قادرة أتواصل، يجي 5 - 6 ساعات. لوقتيش هذا الظلم! لوقتيش هذه المأساة، هالمعاناة! شعبنا انتكب، شعبنا اتدمر، وين العالم؟ بدنا عالم تقف معنا.
محمود البطش:
يمكن تقريبا أكثر من 20 يوم لحتى قدرنا نوصل لمنطقة فيها انترنت، ومن الصعب جدا انك تلاقي الانترنت. نقدر نقول حرب ثانية، اللي هو صعب التواصل مع الأهل، خاصة إنه أهلي في الخارج في المملكة العربية السعودية، وصعب إنه نتواصل معاهم، بعد عناء وتعب، طبعاً النت للأسف ميت ع الآخر، حتى الاتصال والتواصل معدومات تقريبا، من 10 ايام او 15 يوم يا دوب قدرت، حتى والدي من شهرين ما كلمتوش وأخوي اللي اصغر مني.. اللي برا كلمته قبل 10 أيام أو 15 يوم، طبعاً معاناة بكل ما تحمله الكلمة من معنى، هذه حرب ثانية غير الحرب اللي احنا قاعدين بنعانيها، والحرب والدمار وكل هذا اللي احنا بنشوفه.
