شهادة نازحة في رفح حول بحثها عن جثث أهلها بين الجثث التي سلمها الاحتلال
هذه شهادة المواطنة منتهى عبيد النازحة في رفح حول بحثها عن جثث أهلها بين ما سلمّه الاحتلال من جثث، تم تسجيل هذه الشهادة بشكل خاص لموقع حكايا غزة وهذا نقل نصي لها كما وردت:
النص:
السلام عليكم ورحمة الله وبركاته معاكم النازحة منتهى فؤاد محمد عبيد من سكان شمال قطاع غزة جباليا. تم نزوحي هنا لأنه ما إلنا مناطق و تهجرنا و تهدمت بيوتنا على رؤوس أهاليها و إجيت أنا و أطفالي هنا لحتى نعيش حياة كريمة.. ف جابوا أكثر من 80 شهيد و قالوا إنهم من الشمال فأنا إجيت بسرعة لإني أنا مقطوعة إلي أربع شهور عن أهلي ما بعرف عنهم و لا حاجة لا إتصال ولا تواصل.
إجيت حتى أشوف إذا في حدا منهم من أهلي فاتطلعت (نظرت إلى) على الوجوه متحللة تماماً ما بعرف حدا. ف إحنا حياتنا قلبت رأسًا على عقب ما توقعنا إنه هيك نعيش، بدنا حياة حلوة بدنا عيشة كريمة. هيك عايشين بين القبور زي ما انتو شايفين احنا عايشين بين قبور. بدنا حياة كريمة بكفي عن جد. إحنا نفسيتنا تعبت و أطفالنا حتى تعبوا. بدنا حياة كريمة لأطفالنا بكفي حرام بكفي.
مافي اتصال و لا تواصل مع أهلي ولا مع أمي و لا مع أبويا و لا مع حدا.
يعني بكفي بدنا حياة كريمة بدنا نعيش بكرامة. خلاص ... وقتيش لنضل هيك عايشين بين القبور؟ أكلنا و شربنا بين القبور حتى أطفالنا إحنا ما توقعنا إنه هيك أطفالنا تعيش أو إحنا هيك نعيش. حسبي الله و نعم الوكيل.
