شهادة عن الاعتقال من الصفطاوي بغزة - ياسر عرفات
هذه شهادة ياسر عرفات من مخيم الشاطئ والذي تم اعتقاله في 28 ديسمبر وتم الإفراج عنه بعد 41 يومًا، تم تسجيل هذه الشهادة بشكل خاص لموقع حكايا غزة وهذا نقل نصي لها كما وردت:
النص:
اسمي ياسر عرفات محمد محسين، سكان مخيم الشاطئ، تم اعتقالي بتاريخ 28/ 12/ 2023. مدة الاعتقال 41 يومًا. اعتقلوني من بيت أنا نازح فيه، بيت بكون بيت عديلي، شرس صفطاوي في شمال غزة، أخذونا من البيت أنا ومجموعة من أهل البيت.
الرجال والشباب، والنساء والأطفال أخذوهم من عارف وين ودوهم، في منطقة قالولهم روحوا عليها بس أنا بعرفهاش… أخذونا على ثكنة عسكرية بالقرب من بيت الاعتقال، وتم خلع ملابسنا بالكامل، وأخذونا على منطقة ثانية وتم التحقيق معنا فردًا فردًا…
الأسئلة الي عرضونا عليهم: وين كنت ب 7 أكتوبر؟ إيش سمعت إيش عرفت؟ مين هم الي خشوا (دخلوا)؟ مدنيين أو عسكرين؟ وأنا أقلهم مش عارف بالزبط… أنا صراحة بعرفش اشي كنت… أخذونا بعد هيك اجى ضابط، بعد حوالي ساعتين تلاتة من المدة الي كنا قاعدين فيها أخذ الاسم الرباعي، ورقم الهوية، ورقم الجوال واسم المهنة إذا بتشتغل.
بعد ما أخذ منا الأحوال هاذي ركبونا بشحنية (شاحنة) وأخذونا في منطقة لجوا، أعتقد فيما أظن في الغلاف أو بالقرب منها… قالوا نطوا من الشحنية وناموا على بطونكم في البرد الشديد، كنا في البرد الشديد… كل شوية بيجي محقق بحقق معنا، بده أقوال وبده معلومات عن أسرى، أنفاق، حد دخل عسكريين مدنيين وزي هيك…
ضلينا في القصة هاذي حوالي من أربع لخمس ست ساعات… وأخذونا في جيب، لبسونا أفرهول أبيض والعصبة البيضا وحطونا في الجيب، وأخذونا وين… على العنبر أو المردوان بقولوا عنه… هو السجن بشكل عام، بركس يعني مقسوم نصين… ونمنا على فرشات هناك وضلينا كل يوم نصحى وفي تعذيب وفي وقفة وفي اقعدوا على ركبكوا وكزا وكزا وكلبشات 24ساعة بإيدينا، والغمايات 24 ساعة مغميين على وجوهنا.
ويوميًا الفطور يجيبولنا فطور قليل مش هالاشي بشبعش يعني، كلها قضمتين خبز، تطلي (مربى)، أحيانًا جبنة، مع تفاحة وبندورة، وتونة شوية… أحيانًا بنقصوا الأكل وأحيانًا بكثروه… ويوميًا نفس الاشي هاد. وفي بياخدوهم عالتحقيق بحققوا معاهم، بياخدوا الأقوال الي بدهم ياها… وفي بتم تعذيبهم وشبحههم، وفي ما بتمش تعذيبهم، حسب الأقوال إلي بقولوها وحسب التحقيق إلي بكون معهم…
وكزا كزا عالحال هادا… والنوم في وقت محدد بتحكموا في نومنا، في أكلنا وفي شربنا… ممنوع تتكلم، ممنوع تقف، ممنوع تتحرك، ممنوع ترفع اللثمة عن عينيك… دايمًا ضلك صمٌ بكمٌ عميٌ… من 16 ل 17 ساعة قاعدين قعود…
يعني انهرينا قعود أغلب الوقت، وتبعنا من هادا… ويوميًا الموال هادا… والصلاة أحيانًا بتحكموا فيها أحيانًا بقطعوها عنا، ومتصلوش وأحيانًا صلوا كل واحد لحاله وأحيانًا كله مع بعض… تحكم في الصلاة كله… إلى أن تم الإفراج عنا الحمدلله…
ضليت 41 يوم… أنا واحد من الي ما حققوش معي بشكل كبير، حققوا معاي بشكل بسيط… سألوني عن الاسم الرباعي، المهنة، اسم الأم، وين كنت في 7 أكتوبر، بتصلي في أي مسجد، بتعرف عن القيادات كزا بتعرف معلومات كزا… اسئلة زي هاي..
(يرفع السترة عن يديه وتظهر علامات تعذيب) هذا من الكلبشات، عن التحقيق لبسونا كلبشات، قعدت 3 أيام تحت الكلبشات، إيدي ورمت والتهبت، نفخت، وباخذ علاج عليها، الها حوالي من 20 ل 23 يوم زي هيك وبغير عليها يوم بعد يوم حسب ما ييجي الطبيب، كنت اخذ مضاد حيوي الها.
