شهادات حول تدمير المسجد العمري الكبير في حي الدرج
الصحافي: نحن هنا في حي الدَرَجْ الأثريّ في منطقة غزة القديمة، دمّرت قوات الاحتلال ليس منازل المواطنين فقط، إنّما الأبنية الأثرية التي يعود عمرها لمئات السنين، قصر الباشا المسجد العِمَرَي الكبير وهو أيقونة مدينة غزة، وسوق الزاوية الأثري وسوق الذهب ومنطقة الكنائس وكل المباني القديمة التي يَعُجّ بها هذا المكان وهي مقصد للسيّاح ويشعر الأهالي فيها بدفءٍ كبير، كلّها دُمّرَت عن بكرة أبيها
(أصوات المواطنين مع عرض مشاهد الدمار): تعال، تعال صوّر من هان، تعال .. حسبي الله ونعم الوكيل .. لا تسألني من أنا .. شايف كيف .. في شهداء صلّوا ملايين يلّا ملايين صلّوا ..
الصحافي: يعطيك العافية، عرّفني عليك؟
المواطن: سعد قسّام
الصحافي: اهلا وسهلا
المواطن: هلا بيك يا حبيبي
الصحافي: ايش بتعملوا؟
المواطن: والله محلّ القصف الصهيوني اتضرّر محل جارنا من الذهب وجايين بنرممله ايّاه وبنزبطله فيه
الصحافي: هذا السوق ايش اسمه؟
المواطن: هذا السوق القيساريّة
الصحافي: قدّيش عمره؟
المواطن: ما يقارب المتعارف عليه اللي بتوعاه اللي كبار غزة من 3000 لـ 3700 سنه وفي أقاويل تانية بتقولّك 5000 سنه اللي هو من قبل الملكة هيلانة، طبعاً الملكة هيلانة اللي رمّمت المبنى الجديد، ما قبل الانهيارات اللي قبل الإسلام تمام، قبل الإسلام صار انهيارات في أرض الرباط كاملة.
صار انهيارات وفيضانات رمل فانضمت للمباني القديمة، فَأَجَت هيلانة، فرمّمت اللي رمّمته وعملت اللي عملته وهذا كان أساسه اسطبل خيل عملته الملكة هيلانة، اسطبل خيل لمّا بقت تمرق من هانا وعلّته بالمعلّي هذا عشان كانت تمرق بخيلها بالرمح تبعها ومداه 5 متر، هذا الاسطبل تبعها، هذه كانت اللي هي الكنيسة تبعتهم، فلمّا خلّصت هيلانة وعاد عهد الإسلام وما الإسلام اتخذناه لذكر ربنا تمام
الصحافي: يعني هذا هلقيت …
المواطن: هذا مبنى .. هذا أساسه اسطبل خيل
الصحافي: وهلقيت ايش تحوّل؟
المواطن: هلقيت اللي هو سوق الذهب
الصحافي: هذا سوق الذهب المركزي
المواطن: المركزي، لغزة كلّييتها تمام هذا سوق غزة اللي هو للذهب
الصحافي: هذا ايش اللي راح جنب السوق هذا؟
المواطن: هذا محل
الصحافي: جنب المحل
المواطن: ورا المحل من شمال اللي هو مسجد العِمَرَي
الصحافي: قدّيش عمره المسجد؟
المواطن: مسجد العمري عمره ما يقارب من 3000 لـ 3700 سنه تمام، وفي ناس طبعاً بتضّارب الأقاويل ما بين 5000 وما بين 3700
الصحافي: كان للمسيحيين وبعدين لما إجا الإسلام
المواطن: ما قبل الإسلام للمسيح ايوه بالضبط ما قبل الإسلام
الصحافي: وبعدين اُعْطِيَ للمسلمين
المواطن: اٌعْطِيَ ما هو اتخذ للمسلمين لأنه بناء على انه مكانش مساجد و مكانش مباني ومكانش غيره
الصحافي: ايش يشكّلّك مسجد العِمَرَي وسوق الذهب؟
المواطن: بيشكّل الإسلام بحاله، بيشكّل كل واحد في دول العالم كلّييتها بيقول انا مسلم، يعني مش انت عشانك فلسطيني ولا انا فلسطيني نقول المسجد العِمَرَي إلنا، لا، من جميع وأبعد واحد بيقول انا مسلم لا إله الّا الله، إلُه في المسجد.. هاي بينص المسجد العمري ما بينص لشعب فلسطين بحالها ولا للأردن ولا لمصر ولا للقاهرة
الصحافي: سمعتك بتقول أعزّ من أولادي
المواطن: المسجد بالفعل بالفعل، بالفعل أعزّ من نفسي مش من أولادي كمان
(الكاميرا تتجوّل في المكان وتظهر مشاهد الدمار)
المواطن: الله يعافيك
الصحافي: عرّفني عليك
المواطن: رامز احمد حسّونه ابن الشهيد احمد خالد حسّونه، عيلتي كلّها شهدا الحمدلله
الصحافي: تقبّل الله
المواطن: شكر الله سعيك
الصحافي: ايش هذا المكان
المواطن: طبعاً هذا قصر الباشا، معروف منذ القِدَمْ يعني فوق 700 سنه إِلُه موجود، أنا إجيت بعد رحيل تقريباً شهر من هالمنطقة… غزة مش غزة اللي بنعرفها، غزة اللي كنّا احنا بنكنّ إلها كل حب وكل احترام مش غزة، هذي صحيح مدرسة الزهرا، ربّت اولادي هانا بناتي كانوا فيها، مدرسة الرملة هذي عفواً وهذي الزهرا، زهرا خرّجت اجيال يمكن 40 جيل في بعض، هذي وهنا ..
الصحافي : ايش الآثار اللي دمّرت؟
المواطن: هاي المسجد العِمَرَي قُبّة المسجد العمري كلّه رايح المسجد العمري هيّه
الصحافي :قدّيش عمره المسجد؟
المواطن: المسجد العمري ما يقارب 900 سنة
الصحافي: ليش سمّوه العِمَرَي؟
المواطن: كان هو .. كان أيام المسيحية كانت الأميرة مش عارف موجودة فيه وسمّوه على انّه بيت معمور كان ومسجد كبير كان وكانت الملكة هيلانة، اظن الله اعلم كانت هي بتمشي من أنفاق من تحت هيك، وهسا راحت الأنفاق زمان من سنين من أيام اجت الصلبة
الصحافي :طب ايش في آثار جوّا مدمّره؟
المواطن: كلّه
الصحافي: الدَرَجْ
المواطن: لا على الدَرَجْ مفيش دَرَجْ، كانت الدَرَجْ لمّا ترجع إلها كانت تأوي كل المساكين والغلابة كان .. هي زي ما انت شايف .. هذي مطبعة منصور المعروفة، معروفة على مستوى غزة .. هاي البناية شايفها مش بناية هذه… طبعاً هذا شارع الوحدة، هذا كل المكاتب والمطابع والتجارة تاعت الناس كلها اللي انت شايفها هذي… ولا أي مَعْلَمْ بيت لا يصلح للسكن
الصحافي: ايش شعرت لما شفت اثار غزة القديمة؟
المواطن: ايش شعرت؟ يعني أنا أبو شهدا ومرتي شهدا وابويا شهدا وبنزف دم هان .. يعني غزة انا بعرفش بيتي وين اروح .. انا قاعد بدوّر بطّلّع ع البيت تاعي مش ملاقيه… مالوش معالم .. بطّلّع هان ارضنا كانت هان، المحل تاع اخويا هان، 150 الف دينار خسر اخويا هان في الزاوية، الزاوية من اقدم الاسواق في غزة
الصحافي: سوق الزاوية برضه …
المواطن: كله كله مبتلاقيش اي حاجة
الصحافي: سوق الزاوية أثري
المواطن: آه آه معروف أثري، أقدم سوق في قطاع غزة، سوق الزاوية، لا إلُه محل ولا إلُه معالم ولا إلُه .. ناس راحت بالهَبَلْ، كانوا هنا شهداء مرميين في الشوارع في الطرقات انا بعرفش ايش اللي صار، رحت اشوف الدار مالقيتش في ديار ولا دار، يعني اللي احنا فيه الله يكولنا معين، هذه حرب مش إبادة هذه حرب خلاص اقتلاع الفلسطيني من الأرض كلّه كليّاً
الصحافي: ممكن يقتلعونا؟
المواطن: والله لو بموت على رقبتي، مالك يا راجل، انا فوق اللي راحلي، راحلي 9 .. 2 اولاد اخوتي وابويا واخويا دكتور لوا مالوش علاقة في الخدمات العسكرية ولي أخو صحفي معكوا مدير في جامعة الأقصى محاضر وكذا جامعة استشهدوا الاتنين، اولادي 4 استشهدوا وامهم.
انا قاعد بجري بس اقعد على مأوى اجيب البنات، ضايل 3 بنات صغار عندي والولدين هادول اللي انت شايفهم، اجيبهم عندي عشان بس اعرف كيف اكل، انا إلِي يومين مش ماكل، يعني اليوم بدوّر على لقمة العيش احنا بنموت ولا بنطلع، والله لو كان مش نتنياهو ولا جالانت ولا جو بايدن اقسم بالله اللي اعظم منهم ما هم طالعين معنا راس.
بيكفّي العزيمة بتاعتنا والإرادة تاعتنا، احنا بنموت عشان فلسطين، عارف نندفن والله مستعد اندفن وإنا حيّ فوق النكبات هذي فيش نكبة يا خال، الدمعات جفّت عنا، القلب مات، المقابر جرّفوها من بكرة أبيها… 1000 قبر اخدوه واخدوا منّه أعضاء بشرية
(الكاميرا تعرض مشاهد الدمار)
