شهادات حول معاناة النازحين في منطقة الخيام بمدينة رفح
شهادات حول معاناة النازحين في مدينة رفح جنوبي قطاع غزة في منطقة المخيمات حيث أجرت الصحفية لقاءات مع مجموعة من النازحين وسألتهم عن أحوالهم ومخاوفهم في حال إذا ما توقفت خدمات وكالة الأونروا مثل ما حذرت بسبب قطع الدعم عنها من الكثير من الدول الداعمة بعد التحريض ضدها من قبل الإحتلال الاسرائيلي
أهلا بكم؛ 120 يوماً من الحرب الإسرائيلية المتواصلة على قطاع غزة توقفت فيها الخدمات الأساسية والهامة للإدارة والحكم في قطاع غزة، السلطات المختلفة، البلديات ومنها خدمات توصيل الغذاء، المساعدات، ترحيل النفايات وحتى تسليم المستحقات والرواتب في قطاع غزة ما أدى لإنهيار حقيقي في حياة الأهالي في قطاع غزة.
في منطقة الخيام هذه في مدينة رفح تجري أحاديث بين الأهالي والنازحين عن مخاوف من التصريحات التي أطلقتها الأونروا من أن تضطر لوقف عملياتها وخدماتها في قطاع غزة بنهاية شباط الحالي إن استمر قطع الدعم عنها من دولٍ عديدة أعلنت أنها توقفت عن تمويل الأونروا بسبب ما تقول بأنه تورط في أحداث عنف ما تسميه ضد اسرائيل
سنتحدث هنا مع النازحين في الخيام لنعرف آراءهم ونقترب من مخاوفهم التي ربما بدأت تضاف إلى مخاوف عديدة خلال هذه الحرب التي امتدت اليوم حتى هذا اليوم.
ودّقت ما كان فيهم من آمالٍ بأن يعودوا إلى بلادهم إلى أراضيهم إلى بيوتهم التي هجرتهم إسرائيل منها وأجبرتهم على الخروج بخدمات اعتادوا على وجودها، خدمات النظام الصحي والتعليمي وخدمات توزيع المساعدات والأغذية
( تتوجه الصحفية باتجاه مجموعة من النازحين الجالسين بالقرب من خيمهم لتحاورهم )
السلام عليكم؛ يعطيكم العافية؛ من وين نازحين يا حج ؟
من غزة الصبرا، غزة الصبرا الشمال
كنت تتلقى خدمات من الأونروا من الوكالة قبل ما تنزح لرفح ؟
صحيح، اه الكبونة، كبونات الوكالة كنت كل 3 شهور.
الصحة كنت تروحوا عالوكالة والعيادة ؟
صحيح
الآن التصريحات اللي بتقول فيها الأونروا أنه هي ممكن لنهاية شهر شباط شهر 2 اللي احنا فيه توقف عملها إذا كان إستمر دعمها من دول عديدة في العالم، شو بتعنيلك ؟
بدها توقف يعني هي
ااه
واللهِ إحنا بنروح هلقيت على عيادات الوكالة فش دوا بيدوك حبة وجع راس بيدوك حبتين فهمتي ؟ واذا بتوقف عالآخر الناس هتمرض.. بتلاقيش علاج هتمرض الناس.
وحتى الآن فيها الأطفال عيانين يمكن ما عندك مساعدات؛ بعدين فيها عيانين الأطفال مش ملاقية علاج فش علاج يعني أغلبيتهم هلقيت تغيير الجو من السقعة للشمس هذا بيأثر على الأطفال
طيب وقف خدمات الأونروا المتوقع إن استمر الوضع الحالي برأيك كيف ممكن يأثر عليك على جيرانك على معارفك ؟
عالكل؛ هيأثر عالكل عالمجتمع كلو لأنو كله أغلبيتنا هنا، هانا تقريبا بننعد مع سيناء الجو هذا فهمتي ؟ سقعة وبرد مش زي فغزة دور جنب بعضها هان تقريبا خلاء والله بيأثر كارثة بتصير مشكلة، هيك مشكلة إذا وقفت الوكالة مشكلة
برأيك ليش بيحاولوا فهذا الوقت بالذات يوقفوها
الله أعلم يمكن سياسة، بعرفش
شكرا إلك، ربنا يحفظك
العفو
( انتقلت الصحفية للنازح الثاني وهو مواطن شيخ كبير في السن )
حج، كيف حالك ؟
نحمد الله ونشكره الحمدلله
من وين جاي ؟
من غزة
من الصبرا ؟
من الزيتون فحوالين الصبرا
كنت تتلقى خدمات من الأونروا هناك ؟
أنا لا احنا مواطنين
هذا الوقت لو توقف فيه زي ما أنت شايف بالنسبة لصحابك جيرانك معارفك كيف ممكن يأثر هذا الموضوع عليكم ؟
صلي على النبي؛ احنا أول حاجة هذا النا هنا تقريبا صار 4 شهور لحتى الآن انا ما اجتنيش أنا ولا كرتونة مساعدة، وهي الشادر سويت الخيمة هان وشتت علينا الدنا وغرقنا مرة ومرتين وما حدا ساعدنا لا فشادر ولا فعلبة لحمة ولا أي حاجة ما شفنا ولا حاجة والحمدلله.
بنقول الحمدلله وانسرقت 3 مرات من الخيمة من هانا مبارح سرقوني وأنا فقلب الخيمة نايم وعيالي بتقول حسبي الله ونعم الوكيل عاللي سرقنا وش نسوي ؟ ما خلولنا لا طنجرة ولا صحن ولا كرسي ولا حاجة نظاف يعني لو بدي أنا اجي اتغدا ولا حاجة بلاقيش صحن أقعد آكل فيه
الله يعوضكم يا رب
الحمدلله الحمدلله
شكرا جزيلا يعطيك العافية
العفو شكرا يا عمي
( تتجه الصحفية للنازح الثالث الجالس برفقتهم وتوجه له أسئلتها )
بتقول أنو خدمات الأونروا فالفترة الحالية مش زي ما تعودتوا تشوفوها ؟
يمكن 10% أول يعني كنا مستفيدين كويس بس فالوقت الحالي الوضع سيء خالص حتى اللي بيتقدم حاليا علبة فول لسبعة أنفار مثلا عيلة علبتين فول بس هذا اللي بنستقبلوا منها بس
ولو وصل ووقفت تماما ؟
لو وقفت تماما هيكون كارثة رسمي لأن الأغلبية احنا زي ما بتقولوا جايين عالاحتياط من الشمال لهنا الكل وضعنا سيء والصغار والبهدلة والمرض فاهمة كيف رسمي رسمي بهدلة
الله يفرجها يا رب يعطيك العافية
( تعود الصحفية للنازح الأول )
حناكل زلط.. المشكلة فالصغار عندنا الصغار لازم بدهم بيض لازمهم حليب متشوفش احنا البيض فالدكاكين بينباع فالسوق السودا ب 60 وب 70 بينباع الكرتونة
شكرا إلك الله يعطيك العافية
( تتحرك الصحفية بعيدا عن مجلس النازحين قليلا )
ربما مشاهدينا سمعنا كيف أن هذه المخاوف مخاوف حقيقية لديهم ويعرفون أن وقف خدمات الأونروا سيكون له آثار كارثية عليهم
( تتجه باتجاه مجموعة أخرى من النازحين )
سنتحدث الآن ربما مع مجموعة أخرى من النازحين هنا في المكان مع الحج والحجة اذا بتسمحولنا نحكي
السلام عليكم يعطيكم العافية؛ كيف حالك يا حجة ؟
الله يسلمك الله يخليك
من وين نازحة ؟
من البريج
من البريج يعني مستفيدة من خدمات الأونروا صح ؟
ولا حاجة
قبل ما تنزحي من البريج !
ولا بالبريج؛ إيش قصدك
لأنو الأونروا بتقول أنه وقفت كثير دول دعمها للأونروا وبتقول أنه هذا الحال هيخليها توقف بنهاية الشهر يعني خلال شهر رح توقف خدمات الأونروا؛ لا بيضل فيها عيادة ولا بيضل فيها
كنا بناخذ من العيادة دوا ونوخذ أولها يعني
وقف كل الوكالة توقف وتصير مش كوجودة كيف رح يأثر عليكِ على جيرانك على معارفك
رح يأثر على كل حاجة؛ احنا يعني أنا مريضة ضغط وسكر من وين أجيب الدوا ؟
كنت تروحي عالعيادة ؟
اه بروح كنت أروح
تاخذي دواكِ من عيادة الوكالة ؟
اه من عيادة الوكالة بقيت آخذ علاجي كله وساعات اشتريه شرية
والمدارس ؟
والمدارس بيروحوا ولادنا عالمدارس يعني، اذا سلموا دفاتر يوخذوا مسلموش مسلموش إيش بقوا يعطوا فالمدارس يعني..
يعني حتى القرطاسية الاولاد بياخذوها من الوكالة ؟
مش للكل.. مش للكل
بس يعني أنو بتفرق معكم.. لو وقف تعليم الوكالة حتى كلو فغزة ؟
طبعا طبعا مصيبة هذي مش اا أنو يوقف يعني مصيبة طبعا ها وين ايش يطلعوا الولاد جاهلين ؛ أنا عارف شو الواحد بدو يقول وشو بدو يحكي
ساكنة فالخيم ؟
هيها
قديش صرلك ؟
صرلي شهر هان جاية، بقينا بالدير جينا إلنا شهر
ربنا يهونها عليكم يا حجة شكرا إلك
( تتجه الصحفية لأحد أقرباء المرأة الذين يجلسون برفقتها وتواصل حديثها )
خليني أتكلم معك جملة أتوقع رح تكون يمكن عندك وجهة نظر فيما لو وقفت كل خدمات الأونروا في غزة مثل ما بيتم التحذير منو؛ هذا شو رح يعني ؟
لو توقف خدمات الأونروا ! بيبطل في تعليم بيبطل في مثلا تسليم للناس الفقيرة اللي بتستنى الطحين والسيرج ( زيت الذرة للقلي) كل شهر وكل دورة في ناس عايشة عليهم والأطفال كلهم بيتعلموا في مدارس الأونروا لو فعلا وقفت دعم الأونروا إيش بدهم يسووا الأطفال هذول
إيش بتتوقع يصير ؟
اه طبعا الجهل هيعم، الجوع كمان فوق ما احنا يعني الوضع كثير صعب هيزيد ويصير أسوء؛ إحنا بنطالب الدول كلها أنها تظلها تدعم الأونروا لأنه الأونروا إلها دور كبير في دعم الأطفال ودعم الناس الفقراء والناس الغلابة اللي فغزة.. اه بس.
شكرا إلك، شكرا جزيلا
( تتجه الصحفية بإتجاه تجمع آخر للنازحين بين الخيم )
وربما نتحدث أو نستمر في جولتنا في المكان بين خيام النازحين الذين أتوا من مختلف مناطق قطاع غزة في ظل حديث سابق للأونروا عن حاجة وإعتماد مليون شخص في قطاع غزة على المعونات الغذائية للبقاء على قيد الحياة.
المعونات الغذائية التي تقدمها الأونروا هذا قبل هذه الحرب الضروس التي تُشن على قطاع غزة والآن ربما تكون الأرقام أكبر بكثير بعد فقدان أعداد كبيرة من أهالي قطاع غزة لمنازلهم مصادر دخلهم وسبل عيشهم في القطاع بسبب هذه الحرب
( توجه حديثها لأحد النازحين بداخل خيمته )
يعطيك العافية.. نحكي معك ؟
في إيش ؟
نسألك سؤال عن الأونروا!
بهمش
الله يعطيك العافية
( رفض النازح الحديث عن الأمر حتى وتواصل الصحفية سيرها بين الخيم المكدسة والمتلاصقة للنازحين )
السلام عليكم
يعطيكو العافية؛ نحكي معكم؟
حجة بدي أسألك؛ السلام عليكم كيف حالكو ؟ إيش جارات هنا ؟ ولا هناك ؟
اه حبايب؛ هناك وهينا
من أي مكان جايات ؟
من البريج
حجة بتروحي على عيادة الوكالة ؟
واللهي أنا
سابقا قبل الحرب
اه قبل الحرب اه اه كنا نروح نتعالج
هلأ انو الوكالة بتحذر أنو هي آخر الشهر رح تضطر توقف كل خدماتها في قطاع غزة وفالمنطقة كلها حتى بسبب أنه هم وقفوا التمويل، هذا الإحتمال
يعني ما احنا مش مبسوطين فيه الخبر؛ اه كل الشعب بيتأثر منه
كل الشعب ؟
يعني ولادنا أحفادنا وكلنا بنتعالج وين فالوكالة.. الحمدلله الحمدلله احنا هلقيتا فالخيام والمي علينا وتعبانين ونفسيتنا تعبانة وكل الأمراض انحطت فينا فهالأيام هذي فوق يعني بعد الحرب زاد علينا الألم.. وجع فالمفاصل وجع يعني بالعافية الواحد لما يمشي أكم من خطوة.. اه الحمدلله إيش بدنا نسوي يعني
فش فراش فش حاجة ؟
فراشنا بيمتلي مي بنقوم بنشيل الفراش كلو ميه والتغذية ضعيفة عندنا يعني ما أنتِ شايفة الوضع صعب صعب علينا الحمدلله الله يهونها على جميع الشعب الفلسطيني يا رب
( تتجه الصحفية للمرأة التي تجلس مقابلة لها )
حجة كيف حالك ؟ خليني أقعد جنبك تسمحيلي نحكي ؟
اقعدي مهي حكت وخلصت
جاية من البريج أنت ؟
أنا من النصيرات والله
حجة هذا القرار اذا صار التخوف من أنه الأونروا توقف
هذي نكبة إلنا، نكبة ثانية هذي نكبة قوية طب إحنا ما إلناش حدا إلا غير هذي الوكالة بنجيب علاجنا وكل اشي هياتني عيانة والله ما قادرة اقوم لكن مش قادرة أصل حتى أجيب علاج وايش بدي اعمل فش معاي مصاري أتحكم.
وفش معانا حاجة وهياتنا روحي شوفي الفرشة اللي بننام عليها والحرامات شرايط؛ بنحط شرايط وبننام عليهم الله قال نلخي دورنا ونلخي حالنا ونيجي هينا ؟ حالتنا صعبة كثير كثير كثير صعبة.. صعبة
أنت بتقولي هي نكبة ثانية لو وقفت الوكالة؟
اه وستين نكبة مش نكبة مش ثانية ستين نكبة الأطفال هذولا من وين بدهم يعيشوا يتحكموا اللي بقحوا ويتعلموا تعليمنا وقف وكل حاجة؛ كل حاجة إلنا حلوة راحت إيش بدنا نساوي لا حول ولا قوة إلا بالله العليّ العظيم
الناس اللي عايشة على المساعدات الكبونات اللي بتسلمها الوكالة كيف ممكن برأيك تدبر حالها لو ما صار في وكالة ؟
هلقيت ؟
لو بعد الحرب.. خلال هالفترة وبعد الحرب ؟
إيش بدنا الله يكون بعون هالناس الله يكون معنا ولادنا شبابنا الواحد عمرو 30 و 35 سنة مش لاقي شيكل فجيبتو.. فش شغل فش عمل فش اقتصاد فش حاجة النا ضايعين ضايعين ملناش حدا ضايعين
طلعتي من بيتك ؟
اه والله من النصبرات طلعت وهدموا بيتنا انهدم بيتنا راح بيتنا ملناش بيت اه والله انهدمنا والله دارنا انهدمت نزلوها عالرابع صارت عالثاني نزلوا.. اه قاعدة هناك بقيت وضعنا صعب كثير
قديش عمرك ؟
عمري 73 سنة
يعني انولدتي في أيام النكبة الأولى
اه فال 51 سنة الخيم
كانوا يحكولك أهلك عن أيام النكبة والهجرة ؟
زي هيك..
شبه هاذ الأيام ؟
والله هذي أصعب والله ما في منها هي الأيام هذي.. هذي الدار تنهد عليك وعلى أولادك 24 نفر فدقيقة ماتوا
عند بيتك ؟
جيراننا اه جيراننا دار الغفير احنا دارنا اتهدمت كلييتها طارت مضلش فيها حاجة كلها طارت طير نزلوا براميل والبراميل فتحوا الأرض بيجي 7 متر أو 8 متر طيروا الدور طير
والنكبة الأولى كان فيها إنشاء الأونروا النكبة زي ما أنتِ بتوصفيها الحالية يمكن الأونروا تخلص
ان شاء الله ما بتخلصش ان شاء الله ربنا بيزيدنا وبيزيدنا عز وبيزيدنا والله يهدي بالنا كليياتنا
ليش إن شاء الله ما بتخلص ؟
خليها عشان تطعمنا تسقينا وتحكمنا مين إلنا ما الناش حدا مدارسنا وتعليمنا ولادنا هذول اللي بيتعلموا حالنا وين بيروحوا مين بدو يعلمنا يعلم ولادنا
الله يهونها
يا ربي يهونها علينا كلييتنا
شو بتدعي دايما ؟
الله يرحمنا برحمته لأن ما إلنا إلا المستعان الله.. يا رب
يا رب الله يهدي بالكو
يا رب يا رب
شكرا جزيلا شكرا جزيلا لكما سيدات من مخيمات متجاورة أنشئت في أعوام النكبة الأولى أعوام النكبة الأولى التي هجر إليها الأهالي من فلسطين المحتلة إلى قطاع غزة؛ مخيمات البريج النصيرات هذه المخيمات التي الآن هجرتهم إسرائيل ( الكيان الصهيوني المحتل ) منها مرة أخرى.
يتخوفون من أن لا يكون لهم بيوت ليعودوا إليها وأن لا تبقى منظمة الأونروا التي تعلمهم يعني التي تدرس أبنائهم في مدارسها وتعالجهم في عياداتها الطبية وتقدم لهم المعونات الغذائية بعد حملة وهجوم إسرائيلي كبير .
وتحريض كبير على هذه المنظمة أدى لقطع التمويل عن الأونروا من دولٍ عديدة في العالم أدت لإطلاق تحذيرٍ من الأونروا بأن نهاية الشهر الحالي سيؤدي لوقف خدماتها ليس في قطاع غزة بل في مناطق عملها الخمس جميعها
كانت هذه بعض مخاوف الأهالي في خيام النازحين في مدينة رفح جنوب قطاع غزة
شكرا لكم على المتابعة وإلى لقاءٍ آخر.
