شهادة حول أطفال شمال غزة الذين لا يستطيعون النوم بسبب الجوع
هذه شهادة أم من شمال غزة حول وضع المجاعة وانعدام الغذاء وانتظارهم في طوابير للحصول على ما ينقذون به أولادهم ويسكتوا به صوت أمعائهم الخاوية، نقلها الصحفي أنس الشريف في تاريخ 11 فبراير 2024، وهذا نقل لشهادتها كما وردت:
صغارنا مش قادرين نحصل لهم الأكل، لا في في السوق أكل ولا في شرب ولا في حتى نقدر نشتري معنا مال نشتري، صغارنا بتنام من الجوع، صغارنا قاعدة بتصيح وبتتشعفل في الأرض، بصيح الولد الصغير وبنشربه مي وبننيمه، مش لاقيين نطعمهم بالمرة.
احنا هانا واقفين هانا قاعدين بالساعات عشان ناخذ نتفة أكل نطعمهم مش قادرين نحصلها من هان عشان نطعمهم إياها. سايبينهم في الدار قاعدين بصيحوا. احنا بعرض الله، يعني اتطلع كيف احنا ووين احنا واقفين، قاعدين نتناشد برب العالمين بدنا أكل نوكل ولادنا بدنا نطعمهم بدنا بس ما يموتوش بين إيدينا من الجوع.
احنا بنتناشد برب العالمين ثم فيكو انتو، احنا بنبكي على أولادنا الصغار، اللي بموت ربنا رحمه، واحنا بنتمنى الموت من الله يموتنا قبل ما نموت جوع، ونموت ونموت ولادنا الصغار قبلنا.
حنا اش بدنا نساوي! بنتناشد برب العالمين ثم في الأمم المتحدة اللي سايبينا نموت بالجوع، حرام عليهم يخافوا ربهم يخافو الصغار هذول اللي بين إيدينا يموتوا، الطفل الرضيع مش قادرين احنا نرضعه.
