شهادة محمد الشامي على النزوح ثلاث مرات
الوقت المقدر للقراءة: 7 دقيقة
منذ 9 أشهر
هذهِ شهادة الشاب محمَّد الشامي، يتحدث فيها عن نزوحه المتكرر والظروف الصعبة التي يعاني منها هو وعائلته، وهذهِ شهادته كما أوردها لمنصّة فلسطينيات ونشرت على حسابهم في إنستغرام.
المراسلة: عرّفنا بحضرتك.
محمِّد: أنا اسمي محمَّد الشامي نازح من منطقة بني سهيلا/ الزنّة.
المراسلة: بشو تأثرت حياتك في النزوح إلى مجمع ناصر الطبي؟
محمَّد: أول اشي لمَّا ترحّلنا، ترحّلنا على 3 مراحل: أول مرحلة ترحّلنا من الزنّة على بني سهيلا، كنَّا قاعدين عند أختي، صار قصف وضرب، ملحقناش نشرد.. المهم ما علينا، ترحّلنا مرَّة ثانية من دار أختي على المدارس، من المدارس صار اجتياح لبني سهيلا كلياتها. برضو ترحّلنا من بني سهيلا أجينا على ناصر، وهاي الترحيلة الرابعة إلّي هو الثالث. تأثرت حياتي أنه مضلّش أمل في حياتي، مالنا، بيوتنا، كل اشي راح منها.
المراسلة: حضرتك وين راح تنزح؟
محمَّد: أنا راح أنزح على منطقة قالوا عنها آمنة، ما بعرف إذا هي آمنة أو مش آمنة، أنا مش شايف قطاع غزَّة ولا مكان آمن، الضرب فوق روسنا في كل المناطق. أنا راح أنزح على منطقة رفح على المواصي.
المراسلة: في حال صار هناك ضرب شو راح تعمل؟
محمَّد: والله ما صار في مكان آمن، إذا صار ضرب هناك مش عارفين وين بدنا نروح، مضلّش. قالولنا خانيونس/ الناصر آمن، هاي ضرب وقصف طول الليل، وهاي بدنا ننزح على رفح، وإذا صار ضرب هناك مش عارفين وين بدنا نروح. خلاص، بدنا نسلِّم أمرنا لله، مضلّش مكان ننزح عليه.
المراسلة: هل هناك قصص أو تجارب سابقة لأشخاص نزحوا؟
محمَّد: أحنا نزحنا في 2014، وبـ2023 برضو نزحنا. عندي أخواني، خواتي، نسايبي كله نزح، والكل مبهدل هناك، حتَّى منطقة رفح إلّي بسمّوها آمنة معدومة من أي مقومات للحياة، لا مستشفيات، أمراض منتشرة، مياه فش، دورات مياه فش. هناك النَّاس بتعاني من الأمراض، أغلب اشي الأمراض، أكل شرب معدوم، حتَّى لو لقيناه الأسعار غالية جدًا.
وأحنا صرلنا تقريبًا هين روحنا على الشهرين مضلّش معنا فلوس أصلًا نشتري حاجة. أحنا هين كنَّا عايشين على شوية معونات تيجيلنا بس مضلّش. الحين مش عارف وين بدنا نروح.
المراسلة: شو رسالتك للعالم؟
محمَّد: أنا بوجِّه رسالتي للعالم أنهم يوقفوا مع المدنيين. بكفي، صرلنا 80 يوم وأحنا تحت القصف والبهدلة أشلاء. أطفالنا بطّلوا يشوفوا.. بشوفوا الموت. صار الواحد يتمنّى الموت أفضل من الحياة هذي الموجوة، يا عالم شوفوا إلّي بصير هذا. حرام عليكم، أحنا في الآخر بني آدميين، إنسانية. أنتو الحيوان -إلّي هو الحيوان- في أوروبا بتعملوله قيمة. أحنا بني آدميين مش حيوانات. ساعدونا، ساعدونا بوقف إطلاق النَّار، يا سيدي ما بدنا مساعدات بس ساعدونا في وقف إطلاق النَّار إلّي بصير.
