شهادة الطفلة ميرفت المنزلاوي الناجية من تحت الركام في غزة
الوقت المقدر للقراءة: 5 دقيقة
منذ 9 أشهر
هذه شهادة الطفلة ميرفت المنزلاوي، صورت الجزيرة مباشر مقابلة معها في تاريخ 20 ديسمبر 2023، وهذا نقل لشهادتها كما وردت:
كنت بالمدرسة، روحنا على الدار عشان نتغدى قصفوا ورانا، ورجعوا قصفوا دار عمي، ودار عمي وقعت علينا، وأنا اتصاوبت أنا وأخويا، وأخويا طاب، ماما وبابا استشهدوا وأنا مش عارفة.
يوم الجمعة قصفونا، اللي صار معنا معرفناش نطلع؛ أنا كنت واقفة عالباب وطرت برا، وأخويا طار معايا، وماما وبابا طاروا… كانوا بالمطبخ وشردوا وطاروا بعيد. أخويا لما راح يشتري لبابا كان انصاب عند الدكانة، وإصابته منيحة.. أنا إصابتي خطيرة كانت.
وأنا تحت الردم كنت أنادي على بابا، لما سمعت صوت عمو سامي، ساعة برفع إيدي وبقول أنا أنا. لما شاف إيدي عمو سامي شال عني كل الحجارة وحملني. كانت رجلي طالع منها كل العظم. أخويا عمر ويوسف مناح، ولا فيهم إشي، بعرفش ايش بدي أعمل فيهم. بقدرش أعمل أنا، بقدر بس أعمل حليب لخواتي، بقدرش أعمل غيره. بعرف أعمل بصل مقلي ومجدرة بس، هدول اللي بعرف أعملهم، وبعجن.
أنا كنت وحيدة عند ماما وبابا وخواتي، خواتي ثلاثة توأم، بابا بحبني كتير، كتير، بجيبلي الشو اللي بدي إياه، كل ما أطلب منه إشي بعطيني، عشان هيك أنا وحيدة بابا بحبني كتير، وأنا بحبه.
أحمد بصف سادس استشهد، وأخويا يوسف بصف أول لسا عايش، وأخويا عمر عمره ثلاث سنين لسا بوبو (طفل) وعايش، هما الثنين اللي عايشين، عمو سامي عنده أخويا يوسف وعمو رمزي عنده أخويا عمر، هما عندهم اخواتي وبديروا بالهم عليهم كمان.
أنا هنا بغير، وبأخذ العلاجات، بعملش ولا إشي، بظلني هان قاعدة، لما أطيب بروّح لأخواتي، وبلاعبهم بجوالي، بخليهم يكيفوا معي، وأخوي الصغير بعطيه جوالي، أنا نفسي أروّح أشوف أخواتي.
بابا كان يلعبنا حصان يركبنا على ظهره ويجري، كان يحملنا دائماً، ويجيبلنا ألعاب، بابا بحبني كتير، لأني وحيدة، وبجيبلي حاجات، كان يجيبلي ألعاب، جابلي لعبة بوب ات (Pop it) ودباديب.
ماما وبابا هيهم بالجنة عشانهم مستشهدين، أخويا معهم، وعمتي، ودار عمي كلياتهم راحوا، كليتهم استشهدوا، مع صاحبيتي كمان، وأصحاب أخويا، كلياتهم بيروحوا يشوفوا بعض من الجنة.
