شهادة الفتاة وردة دواس التي فقدت عينها

هذه شهادة وردة دواس حول نزوحها المتكرر، نشرتها صفحة فلسطينيات على الانستجرام في تاريخ 19 يناير 2024، وهذا نقل لشهادتها كما وردت:

ورد دواسمة من الشمال، 24 سنة، نزحنا 3 مرات، رمو علينا اول اشي مناشير انه ننزح من بيوتنا لأنها مهددة، رحنا على الأماكن الآمنة، الي هم قالو لنا عنها أماكن الايواء، بس للأسف ما فش مكان آمن نهائي، رحنا على أماكن الايواء اللي هما بعتونا عليها، بس للأسف نزَّلوها على روؤسنا الساعة 5 الفجر، طلعنا من تحت الردم، طلعنا من تحت الردم، والحمدلله طلعنا بالاصابات اللي احنا فيها هالقيد حاليا. عندي إصابتين، وحدة في عيني وفقدت البصر في عيني اليمين ووحدة كانت في رجلي، بس الحمد لله صارت القدرة مع العلاجات إنه أنا أمشي، بس عيني التانية فقدت البصر فيها نهائي.

بتمنى من كل الجهات المختصة، من أي حد من أي لواء يسعون إلى وقف اطلاق النار بالكامل، بدنا نعيش بأمان، مستقبلنا ضاع، لا ضل مستقبل شباب ولا بنات، ولا أي حاجة، غزة تحولت لمجازر، تحولت لحجيم، بدها سنين لترجع للعمار الي احنا كنا فيه، مستقبلنا كله ضاع فيها، للأسف وصلنا للمرحلة هذا، لجأنا للمستشفيات، واحنا هالقيدا مشردين من مستشفى لمستشفى، ومن شارع لشارع، ايش ذنب الأطفال اللي صار فيها زي هاد.

أنتِ (تخاطب المراسلة) هاتي سبب اقنعي فيها الطفل انه احنا في حرب، مش قادرين نأمن إلهم الاكل الملبس المشرب ولا أي حاجة. نتمنى من كل الدول تقف معانا بوقف اطلاق النار بالكامل، بدنا نعيش بأمان، بدناش لا مساعدات ولا بدنا مال، بدنا وقف اطلاق النار بالكامل، نرجع على بيوتنا، نعيش بأمان سواء احنا أو أطفالنا ايش ذنب الشعب، ايش ذنب العالم، ايش ذنب الأطفال، البنات اتشوهن، الشباب راح مستقبلهم، كله كله المستقبل كله ضاع، لا ضل فيها علم لاضل فيها بيوت ماضلش ولا أي حاجة لحتى الآن، مستقبلنا كله ضاع، حسبي الله ونعم الوكيل على اللي كان السبب، رغم اللي احنا فيه راح نضلنا صامدين.

الوسوم