شهادة السيدة ريم ضربها جندي إسرائيلي على بطنها
الوقت المقدر للقراءة: 6 دقيقة
منذ 8 أشهر
السيدة ريم فلسطينية حامل في الشهر الخامس تعرضت للضرب على بطنها أثناء التحقيق على حاجز عسكري قرب وادي غزة أثناء نزوحها إلى المنطقة الوسطى، هنا نقل لشهادتها كما أوردتها في مقابلة خاصة مع قناة الجزيرة مباشر بتاريخ 11 ديسمبر 2023:
"مكانُ الاستجواب: نقطة تفتيش عند صلاح الدّين عند وادي غزة".
دخلت جوّا زيّي زيهم، كُلهم دخلوا معايا، قعدوا يختاروا فينا واحدة واحدة، رقم الهويّة والاسم وتقعد، دخّلوني أنا لحالي بعيد عن النسوان وحط القنّاص على رأسي وقال خليكِ مأشرة عليها ولمّا شاف رقم الهويّة ظلّه يطّلع ويهز برأسه وأشّرعليّا وحطني لحالي بعيد عن باقي النسوان وقعد يستجوب فيّا، أول إشي أخذني قال روحي لفّي على الممر واقعدي هُناك لقيت جنديات كوم يمكن 10 جنديات، دخلت بخيمة زي هيك بس مفتوح باب واحد للخيمة، وتحكيلي الجندية من بعيد تأشّرلي إيش أعمل إيش أسوّي، تقول لي اشلحي الشّال واشلحي هاد، بس الجنديات كانوا، طلبوا مني أشلح كل أواعيّي ويشوفوا إيش في لابسة إيش في بجيبي بس بالملابس الدّاخلية.
بعدين لبّسوني الجنديات وفتشتني باللّيزرعلى جسمي كلّه هيك قعدت تفتّش فيّا، بعدين أخذوني كلبشوني وغمّض لي عنيّا الجندي، وأخذني مكان تُهت وأنا بمشي، أنا مش عارفة وين بمشي، دخّلني في جبال وبعدين قعّدني بكُرسي وقعد قبالي جندي كبير ضابط وقعد يحقّق معايا وين كنتِ ب 7 أكتوبر وين كان زوجك ب 7 أكتوبر وين كان عمّك ب 7 أكتوبر، في عنّا شهيد استشهد في الحرب وين كان هاد ب 7 أكتوبر، مش عارفة إيش دخلني أنا، أنا مش عارفة أنا جديدة أصلاً على العيلة أنا إلي سنة ونص متجوزة، جديدة على العيلة بعرفش ولا حدا.
كنت أحكيله أنا بعرفش كان يخبطني، كان يضربني، وخبطني على بطني وأنا حامل وقلت له أنا حامل بالشّهر الخامس، خبطني على بطني ولحد الآن بتوجع من بطني، وخبطني على رأسي، بعدين حكى خلاص إذا انتِ بدكيش تحكي صار يهدّد فيي في ابني ويهدد فيي في حالي، صار يحكي لي هلقيت الجنود بيغتصبوكِ وخلاص خذوها، قلت له طخني، بعدين أجى دور حماتي بس أنا بعرفش إنها حماتي اللّي ورايا، قوّموني من مكاني، أخذني جندي سلّمني لجنديّة وأغراضي كانوا حاطينهم بكيس بعدين وقّفتني عند الجّبل وفكّت الكلبشات عن إيديّا وعن عيوني فكّت الشال اللي حاطاها بعدين أعطتني الأغراض بعدين حكت لي على صلاح الدّين عدل وما تلفّيش وجهك.
