شهادة أيمن حرب عن معاناة توفير علاج لطفله المصاب بالشلل الدماغي

أب فلسطيني يروي معاناة طفله من نقص الأوكسجين بعد إجباره من قبل قوات الاحتلال الإسرائيلي على ترك أنبوبة الأوكسجين الخاصة به على حاجز عسكري أثناء النزوح من الشجاعية إلى دير البلح، وتم تسجيل الشهادة على منصة فلسطينيات.

أيمن جمال فهمي خالد حرب، من حي الشجاعية.

المراسل: شو إلي صار معك؟

إلّي صار معايَّ.. وأحنا قاعدين في الدار صار يرموا علينا مناشير اليهود أنه نخلي الدار.. شردنا من الدار ورحنا على مدينة الزهراء، وبعد مدينة الزهراء قال اِخلوا الأبراج.. أخلينا الأبراج، وشردنا ضلينا من بعد الفجر لتاني يوم الساعة 11 الظهر، طلع النهار ورحنا على شارع اليرموك، ضربوا التاج برضه في شارع اليرموك، أخذته وقلت أمان عند دار عمي.. ضرب.. عاودت نزلت على الشجاعية على داري نفس الحاجة،  بعدها ضرب داري علينا وهذا الولد زي ما أنت شايف طلعته من الركام.. أنا وإياه طلعت من الركام، أنا مصاب وهو برضه مصاب وبقي مشحبر (ملطخ بالسواد).

عاودت أجيت هان.. شردت على الأقصى (مستشفى شهداء الأقصى) وهذا الولد بعاني من شلل دماغي ونقص أوكسجين،  ولا في إله أكل ولا في إله شرب ولا في إله حاجة.. كل ما يصير الولد زي هيك -جفاف مفيش إله أكل- بيجي بركبله محلول..  كل يوم على هالحال.. وأحنا ناشدنا كذا واحد يجيبله جرة أوكسجين.. على القليلة جرة أوكسجين..

المراسل: أيش مطالبك؟

مطالبي يساعدوني بجرة أوكسجين.. مطالبي مثلاً يساعدوني يعالجولي فيه للولد.. يعني فش أكل في غزَّة،  أحنا شردنا من الشجاعية ومن الزهراء عشان نلاقي أكل هان.. منلاقيلوش أكل ولا بسكوت ولا حليب، انقطع من كل شيء.. نهائي.. بقلك على المحلول.

المراسل: ايش أسوأ يوم بحياتك؟

إني أشوف الولد زي هيك..

المراسل: ايش بتتمنى يصير يعني؟

أتمنى أرجع على داري، مش مشكلة في خيمة ولا قاعد ، ما أنت شفت والخيمة كلها مية. نفسي أرجع على داري وبس..  أخذ الخيمة حتَّى معايا،  برضه أبويا متصاوب فوق كمان زرّه مكسور وكل الدُّنيا.

المراسل: كان عنده جرة أكسجين في البيت؟

لمَّا أجيت على الحاجز صار يطخ عليَّ "أرمي الجرة".. رميت الجرة. رجعتله صار يزعِّق عليَّ في المايكروفون، قلتله الولد.. شلحتله رجليه عشان يشوفه من بعيد.. قلي: "لا، قدم"، قلتله بدي أخذ الجرة وأرجع مرضيش، قعد يطخ على الأرض.. عاودت جبته على كارة بحمار، وتعب معايا كذه مرة برضه هان.

اقرأ المزيد

اقرأ المزيد من قسم شهادات

الوسوم