شهادات عمال من غزة أفرج عنهم بعد الاحتجاز داخل الأراضي المحتلة
الوقت المقدر للقراءة: 13 دقيقة
منذ 8 أشهر
هذه شهادات لمجموعة من عمال فلسطينيين عن ترحيل الاحتلال لهم إلى غزة، بعد احتجازهم منذ 7 أكتوبر، بثتها قناة الجزيرة بشكل مباشر من معبر كرم أبو سالم في تاريخ 3 نوفمبر 2023، وهذا نقل للشهادات كما وردت:
العامل الأول: احنا يوم 6 اكتوبر قبضنا القبضة وما تمكناش نروح وانحجزنا وضلينا بشقة السكن، بعدين ب 7 اكتوبر صارت الأحداث، وأجت الشرطة العسكرية الاسرائيلية قبضت علينا وحطتنا في السجون قالت بتروحنا ع معبر صوفيا وعلى إيريز بعدين احتجزتنا في سجن عطاروت من بداية الحرب، حققوا معنا وضربونا، لكمات وضربات ورفسات وسيلوا الدم من روسنا، وحققوا معنا وصاروا يقولوا ايش الشخصيات هادي واحنا ما كناش نعرف (المحقق يسألهم عن شخصيات مطلوبة من قوات الاحتلال من خلال صور أو أسماء يمتلكها) وصاروا يكذبونا ويرمونا بالبرد واحنا مش عارفين كيف مصيرنا وكنا نقرأ على حالنا آيات قرآنية.
بعدين أخذونا وقالوا بدنا نوديكوا (نرسلكم) على الضفة أو على إيريز، جميع العمال 4000 عامل تحقق معهم غير الباقي لأني مش عارف مصيرهم، في كبار سن وكانوا يضربوا الكل بدون استثناء، وحرب نفسية كانوا يخوفونا قبل ما يضربونا كمان، كانوا يعملوا حالهم هيك (يضرب يديه ببعض) انهم بدهم يضربونا، ويضحكوا ويأذنوا ويغلطوا على الدين والفاظ مسيئة على الرب استغفر الله العظيم، وغالبيتهم من الدروز وكانوا يستخدموا معنا اللكمات والرفسات ويرمونا في البرد.
حسبي الله ونعم الوكيل (يحاول العامل عدم البكاء) واحنا مش عارفين يعني مصير أهالينا شو صار فيهم وحسبنا الله ونعم الوكيل، ولا جنس الانسانية كانوا يعاملونا، كانوا في دكاترة يقولوا تعالوا بدنا نعالجكوا ونقعد على رجلينا على الحصمة بالساعات على بين ما يجي ويكتبولنا دوا الله أعلم ايش هو الدوا ولما واحد يقله رجلو بتوجعه ولا بطنه بتوجعه يخبطه عدة لكمات أو رفسات تزيد الألم، وحسبنا الله ونعم الوكيل، أكلنا سيء جداً، يعني 3 شقفات (قطع) خبز صغيرة مع مربى أو لبنة الصبح وبعد الظهر وفي نص الليل، وكل ثلاث أو أربع ساعات يقومونا من عز النوم عشان يعدّونا.
يعني سياسة مشينة جداً، وممنوع الساعة، ممنوع الجوال عشان منعرفش الأخبار، وممنوع الأذان، ممنوع إقامة الصلاة وممنوع حدا يصلي جماعة، وممنوع الصلاة ويغلطوا علينا يعني ويضربونا وفي مؤ1ن أخدوه وحجزوه أربع ساعات وخبطوه وخلوه بالبرد والمطر مع انه بالعلم هو عامل عملية برجله وصاروا يسلطوا الرفسات على رجله، وخليه يقعد على رجله وعلى الحصمة، (يوضح العامل على رجله مكان وجود جرح العملية في رجل العامل الآخر) رجله من هان مفتوحة ومعمول فيها عملية وبيقدرش يثنيها تحتيه فأجبروه يقعد ع ركبه بالأربع والخمس ساعات، والي كانت تعذبه يهودية جندية، (عند اطلاق سراحنا) سابونا على المعبر غاد وقالوا يلا روح عند حماس معكوا ساعة قبل ما نسكرالمعبرووصلنا هان، واخدوا الامانات منا (يقصد مقتنياتهم) حوالي كيلو قال عندكوا كيلو مشي قبل ما حماس تسكر وبتلاقوا الأمانات غاد، فوصلنا ملقيناش أمانات ولا حاجة، ووصلنا لعندك هون.
العامل الثاني: أنا كنت عندهم في البراكس (المبنى) تبعهم جوا، ورونا نجوم الليل واحنا مروحين ربطوا ايدينا وصاروا ايدينا سمر وضرب (يؤشر على معصميه) هي ايدي هذا من الحبل تبعهم، ايدي من هان هادا محل الحبل هان، ذلونا ذل وضرب طول الطريق ، طول الطريق يدقوا فينا ويحزق (يضيق الحبل) علي، الأكل يجيبولنا تطلي (مربى) نتفة صغيرة لعشر أنفار، اتنين الخبز مش بيتا، الناعم هاد البودرة، ماتوا كل يوم بطلع 15-20 عيانين.
كل يوم ذل ذل للمخابرات سحب فالليل سحب انتباه ضرب ذل ما مرش علينا بالتاريخ، عمري 57 ورونا نجوم الليل وآخر يومين اجا القائد الكبير، امبارح واوله جابولنا شنيتسل يعني وجبة قبل ما يروحونا، فش وجوهنا صُفُر متنا، كل يوم نطلع عيانين، قديش كنت اترجى لما اخد حبة الضغط مرة يجيبوا ومرة ميجيبوش، آخر ثلاث اربع أيام صاروا يجيبوا يعني انهم محترمين يعني كويسين بعد ما ورونا الذل بالالوان، حبة الاكمول (باراسيتامول) نطالب فيها -دوا- أسنان موت احمر مفش، اذا اعطانا اربع حبات بدي اوزعهن على عشرين نفر، ممنوع يصل أي خبر النا ولا جيش ولا بشر ويقولونا راحت غزة، تدمرت غزة، اولادكم ماتوا، هم يعني ناخد منهم أخبار.
عشان بحكي انا عبراني أسحب من الجيش كلمة من هان كلمة من هان يقولولنا كلو راح غزة كلها بودرة كلها راحت كل يوم يقولولنا راحت، احنا بعلمنا ان كل غزة راحت، يعني احنا كنا عايشين 25 يوم ذل ما مرش علينا في تاريخ الكرة الأرضية، اه وغير السحب على المخابرات وغير الضرب وغير الي اخدوه الي امبارح واحد أذّن، قال الله أكبر هجموا عليه بيطلع عشرين واحد، قلت لهم يا عمي هذا بأذَن بعرّف إنو ميعاد الأذان، حطو فيه قتل (ضرب) ورموه زي الكلب من عند الظهر للساعة حوالي 8 بالليل ومرمي وهو معاه حادث برجله، بقول هذا معاه بلاتين جروه زي الكلب.
كيف الكلب بجروه جرونا زي الكلاب بغمونا (بغطونا) بعينينا وبرجلينا وبإيدينا زي الكلاب بجرونا، ورونا يعني الذل، كل شوي يسبوا فينا يقولوا حماس بدنا نذبح حماس، نقول لهم يا عمي احنا عمال احنا ايش ذنبنا يقول مهو كله أهاليكو كله منكم انتو هدول أهاليكم بتبعوا الكوا، انتوا كلكوا حماس، وطول الليل واحد بقى ماسك عصاي (يقلد صوت العصاة تحتَكّ بالحائط) ما نعرفش ننام، واحد تاني يشغل الموتور طول الليل يعني نيجي ننام يقلقونا الساعة 2 بالليل قوموا انتباه هبلونا هبلونا عن صحيح.
الأكل حوالي عشرين يوم تطلي، لبن، كاكاو لغاية آخر يومين لما أجا القائد العام،، فش -اعتبار ل- مرضى سكر عندهم، فش مرضى قلب ، لاخر اشي صاروا يجيبوا لأنهم قالوا بدنا نروحكوا عشان نقابلكوا عشان نقول انهم بقوا يعزونا، بطانية وحدة بنتغطى فيها على براكس غنم، الي بلاقوا عنده بطانيتين بحطوه على المطرح بشحطوه وبرموه زي الكلب، بطانية وحدة، خمس سجاير بيعطونا اياهن ولما بدنا نولع سيجارة بدنا نبوس ايده 100 مرة ، ذلونا ذل يعني ما مر علي من لما انخلقت اسرائيل لليوم.
