كيف يستخدم الغزيين الشرائح الإلكترونية خلال الحرب؟
شهادات الغزيين حول استخدامهم للشرائح الإلكترونية للحصول على الإنترنت وتأمين خدمة الاتصالات بعد انقطاعها عن قطاع غزة بسبب تدمير الاحتلال لبنية الاتصالات في غزة، نقلت الشهادة قناة الجزيرة مباشر في تاريخ 17 يناير 2024، وهذا نقل لها كما وردت:
المتحدث الأول: احنا ساكنين يعني مخليين من غزة، اتدمرت دورنا، اتدمر حالنا، شققنا، البرج اللي احنا فيه، من بداية الحرب اتصلوا علينا قالوا إخلاء، احنا منطلع من هان وانضرب البرج من هان، إلنا محل تجاري لابني كمان سوبر ماركت كله راح، شققنا، شقتي وشقة ابني في أبراج المقوسي كلها اتدمرت.، أخلينا مع جماعتنا بارك الله فيهم يعني الهم قطعة أرض هان، فقعدنا فيها، خيمنا فيها هان. انقطعت الاتصالات عن أولادنا، وقرايبنا، وبدهم يطمئنوا علينا، فابني من بره دبر شريحة إلكترونية بيسموها e-sim اشي حاجة زي هيك. الاتصالات إلها من كم من يوم مقطوعة عنا فأجيت على أساس إنه نتواصل معاهم، نطمنهم عنا، بيسمعوا في قصف عنا، في إطلاق نار واشي زي هيك في المنطقة اللي احنا موجودين فيها بالزوايدة، فجينا نطمنهم، قلقانين علينا. أنا تجربتي الأولى تقريباً أو التانية فيها، فلقيناها كويسة، جيدة، إنه هاه مقطوعة الاتصالات، ع القليل شفناهم وشافونا بالصورة والصوت، هاي أول اتصال معهم. ابني في الإمارات فأول اتصال معاه قبل شوي كلمته. في إلي بنت في غزة مش عارفين نتواصل معاها لغاية الآن، إلنا تقريبا أسبوع وأكتر مش عارفين نتواصل معها مش عارفين ايش مصير حياتها. متزوجة ومع أهل زوجها موجودين في غزة لغاية الآن مقطوعة الاتصالات عنها ومش عارفين نتواصل معاها.
.
المتحدث الثاني:
والله شابكين نت ع البحر نضيع وقت ايش نسوي! شرائح الكترونية ممتازة والشبكة كتير قوية، حتى أقوى من نت الدار من الآخر، بتحكي مع ما مين ما بدك كأنه نت دار عادي وشبكة أقوى من نت البيت، وهاي 100% شغالة، بتحمل اللي بدك عليها، والله بجي مرتين في اليوم، في الصبح وعلى الساعة 4 زي هيك. تقدر تحكي انه هي الوحيدة انه الواحد يتواصل مع اهله، عشان إذا بدك نت منيح بدك تجي ع البحر أما في المناطق عنا هناك النت كتير ضعيف، الشبكة لها خمس ايام مافش شبكة، فش اتصالات، فهذه النقطة الوحيدة انك تتواصل مع أهلك.
.
المتحدث الثالث:
والله الانترنت مقطوع صار له فترة كم يوم، واساسا مافش كهرباء، عشان الانترنت برضه بنروح على أماكن تانية، فبنحاول من خلال الـ e-sim الشريحة الالكترونية نطلع على هذا المكان، زي ما انت شايف كل الناس موجودين بيحاولوا يشبكوا من خلال الـ e-sim، هي شبكات غير الشبكات الفلسطينية وبنحاول نتواصل مع أهلنا برا، بنجي من مناطق بعيدة احنا، صحيح موجودين في هذه المنطقة بس برضه جوا مش إنه قريبة، يعني صعب نطلع كل شوية، نطلع مرة واحدة في اليوم، بدنا نعمل تحديث لكل ال.. نشوف محادثاتنا مين باعت لنا من اشي، نعرف الأخبار، منعرفش اشي صار لنا كم يوم مقطوعين عن العالم، في ظل الوضع أكيد مفيش غيرها للأسف حتى اتصال منقدرش نتصل في أقاربنا، حتى اللي في خان يونس، في رفح، في غزة، ما بنقدر نتواصل معاهم، لكن من خلال الانترنت ممكن نقدر نتطمن على بعض.
