شهادة رامي أبو راس عن الاعتقال
بعدما اعتقدت عائلته أنّ ابنها شهيدًا بفعل إصابته من قبل الاحتلال الإسرائيلي.. الآن يعود محررًا بعد أن احتجزه الاحتلال الإسرائيلي لعدة أسابيع، تحياتي لك
حياك الله أخي
الحمدلله على سلامتك
الله يسلمك من كل شر يا رب
حكيتلنا إنه الأهل اعتقدوا أنك استشهدت يعني، الآن شو وضعك انت؟ طمن الأهل!
الحمدلله رب العالمين، أنا اليوم طلعت من المعتقل من عند الاحتلال بفضل الله، وهيني بخير الحمدلله، وأنا حابب أطمّن أهلي إنه أنا بخير الحمد لله، وهيني في المستشفى بدي أتعالج وان شاء الله ربنا بقدّر يجمعني بيني وبينهم، لأنهم هم ضلوا في غزة، الزيتون (اسم حيّ في غرب غزة)
طبيعة إصابتك؟
طبيعة إصابتي كله تعذيب يعني، خبط ورقع من هان لهان، تعذيب كله، الحمد لله..
وقت ايش انقطع الاتصال مع الأهل بعد اعتقالك؟
كنت أنا وأهلي بتاريخ 12.6 كنت أنا وأهلي في الدار، الساعة ستة الصبح، الجيش هجم علينا، دخل علينا الجرافات والجيش، طلعت من الدار، رفعن الرايات البيضاء، طلعنا من الدارعلى أساس إنه زينا زي الناس، إنه بياخدونا بحطونا بمنطقة آمنة، يودونا على الجنوب، فش عليا اشي لا أنا ولا أمي ولا غيره وغيرات (الآخرين)، طلعنا ومرتي وولادي وزوج أختي وغيره غيرات، طلعنا من الدار.. حطوا الرجال على شقة والنسوان على شقة وقعدوا يلمو من أهل الحارة زي هيك، بعد ما هدأ إلا هم بقولوا للنسوان والأطفال روحوا اتجهوا في منطقة.. على منطقة تانية أخدوهم، واحنا أخدونا على منطقة تانية طبعا المنطقة هادي (هذه) ضلينا فيها ثلاثة أيام بدون لا أكل ولا شرب وخبط وعذاب مايعلم فيه إلا رب العالمين..
كيف أطلقوا سراحكم؟ كيف ظروف إطلاق السراح؟
قبل ما احكي عن ظروف الاعتقال.
إطلاق السراح كان الصبح، امبارح بالليل كشف، نظام كشف نادى الأسامي قعدنا على شقة بنظام بركس برا (في الخارج) في الهواء والسقعة، نظام في برداية وحدة عليك، فرشة نص سانتي، وقالنا خليكم هون للصبح، تاني يوم الصبح احنا أصلًا راكبين الباص مش عارفين وين رايحين، تفاجأنا احنا ايش عبوابة كرم أبو سالم ويقولك اتجه على المنطقة الجنوبية!
قديش (كم) مشيتوا مسافة؟
كرم أبو سالم، من المعبر لحد ما وصلنا عند تبعون الوكالة
عدة كيلومترات؟
آه عدة كيلومترات..
كيف اللي كانو معاك، في عدد كتير؟ شو ظروفهم؟
عدد كتير، نفس ظروفي، كل واحد، سبحان الله الظروف متفاوتة، درجة التعذيب اللي كانت بس، أما كلنا نفس الظروف، تقريبًا حوالي باصين اللي وصلوا هناك، كل باص تقريبًا فيه ثلاثين نفر
تعذيب؟
آه هو التعذيب، كل واحد التحقيق بده يكون مصيره، هذا اللي صار
ايش هي سلوكيات التعذيب اللي كانت؟ وسائل التعذيب؟
التعذيب أصلًا وانت قاعد، أول حاجة وانت قاعد، طول فترة وانت معتقل وانت قاعد على ركبك، طول فترة الاعتقال وانت على ركبك، كيف قاعد على ركبك على الأطراف منها، انت غيرت قعدتك على السريع بتقف على السلك وترفع ايديك فوق، بتضلك (تبقى) مشبوح، هذا اسمه نظام الشبح، يا ترجع تقعد على ركبك نفس النظام، طول اليوم من الصبح يستلموك تقريبًا من الساعة ثلاثة الفجر تقريبًا من ثلاثة لحد الساعة عشرة على نفس النظام..
إهانات؟
إهانات حدّث ولا حرج، هذا اللي هو موجود يعني
أنا بس سامحني يعني بس أنا ملاحظ إنه الوزن شوية هيك رايح، ايش ظروف الأكل والشرب؟ وزنك نازل كتير بيحكوا إخواتك
نظام الأكل هناك إنك ما تموت، بس! بس النظام إنك ما تموت، مش النظام إنك تعيش أو تأكل! إنك تضل انت ما تموت عندهم، فترة إنك تضلك (تبقى) عايش، نظام شريحتين فيتا مع جبنة، ومرات يجيبلك أربعة، وإذا انت كمان كنت مخالف أو برمت (التففت) أو إذا حدا من اللي موجودين معاك من العنبر برم (التف) كلمة ممكن يمنع عنك الفطور والغداء والعشاء..
عقاب؟
آه عقاب جماعي للكل، كانو يمنعوه عادي!
هو في الأساس كيف تم اعتقالك؟
عادي، الجيش وصل لعند باب الدار، طلعت أنا عند باب الداربنظام الراية، بقولهم يا عمي أولاد أطفال احنا مواطنين لا احنا عساكر ولا حاملين سلاح، وهي اللي صار اعتقلوني من ساعتها، من ساعتها لحد الآن
طيب، كيف كان شكل الآليات، الجنود ، الدبابات، كيف وصلوا عندكم؟
عادي اجتياح عادي وصل لعندنا لحد منطقتنا، لما قرب الاشي لعندنا لعند بوابة الدار، أنا طلعت من باب الدار ورفعت الراية وطلعت ولادي وقلتلهم يا عمي احنا مواطنين آمنين ما النا لا في تنظيمات ولا عسكر ولا معانا سلاح ولا معانا نقاتل، واجو معانا كمان جيراننا والشباب وكله (الجميع) نفس النظام هذا اللي صار..
ليش الاهل اعتقدوا إنه استشهدت؟
لأنه كتير من الحارة عندنا استشهدوا، كتير شباب من الحارة عندنا استشهدوا، كتير أنا تفاجأت توي (الآن) حتى وأنا راجع هانا (هنا) إنه في ناس أسامي مستشهدة من الحارة!
كيف استشهدوا هدول؟ هل سمعت عملية اطلاق نار لما كنت موجود؟
طول ما احنا موجودين كان في عمليات إطلاق نار، قعدنا ثلاث أيام متحاصرين في الدار، ثلاث أيام متحاصرين في الدار حصار غير إنه ثلاث أيام كمان حجزونا هم عندهم في غزة لوقت ما نقلونا على مناطق البركسات..
تمام، تذكرلي بس لما اعتقلوكم وعصبوا عينيكم وقيدوا أيديكم بهذا الشكل، كنت تسمع إطلاق نار لما حجزوكم بالعشرات في منطقتكم ولا لا؟
كيف كيف؟
كان في عمليات إطلاق نار لما كنتوا انتو معصوبي الأعين ومقيّدي الأيدي، كنت تسمع إطلاق نار؟
في إطلاق نار كان في المنطقة صحيح
ايش هذا بيدل؟
كل اشي كان.. الاشي أصلًا احنا تفاجأنا فيه، بقولك الساعة ستة الصبح صاحين تفاجأت إطلاق نار كان على حوالين الدار وفي الدار..
على أشخاص، على أشخاص! في شهود عيان كانوا يحكوا كانت تتم عمليات إعدام ميداني، انت حكيت قبل شوي إنه في ناس استشهدوا اتفاجأت انهم استشهدوا، هل هذا الأمر بتقدر تتذكر اشي منه؟
والله انا ما بتذكر ما شفت بعيني، بعيني ما شفت الحدث هاد، بس ممكن يكون صار، أنا اتفاجأت إنه في أشخاص يعني أنا كنت قبل ثلاثة أيام قبل ما ننحجز في المنطقة اللي احنا فيها بثلاثة أيام انهم كانوا موجودين عايشين، يعني في دورهم (بيوتهم) مع أهاليهم مع أولادهم مع هاد في نفس المنطقة، ايش اللي صار معاهم وكيف استشهدوا وظروف استشهادهم ما عرفت والله.
يعني كانوا في بيوتهم أحياء ولما تم اعتقالهم بعد هيك.. ما أعرفش لما تم اعتقالهم ولا قبل ما يتم اعتقالهم إنهم استشهدوا..
حمدا لله على السلامة
الله يسلمك يا خالي
مين معاك من المرافقين وما شابه هنا؟
ولاد عمي "يشير إليهم"، أجيت من كرم أبو سالم وهم كانوا متواجدين في رفح، فأنا تواصلت.. قدرت أتواصل معاهم وأجوا ولاد عمي..
يعطيك العافية، "ثم يتحدث إلى أحد أبناء العم" كيف حالك؟
الله يعافيك، حياك الله
اتطمنتوا أخيرًا إنه على قيد الحياة؟!
الحمدلله الحمدلله، ان شاء الله بنتطمن على بقيتهم لسه في ضايلين بقية من أولاد عمي جوا.
كم واحد معتقل؟
والله حاليًا ضايلين ثلاثة، ان شاءا لله خير يا رب
ايش بتعرفوا عنهم؟ وايش سمعتوا عنهم؟
والله احنا اللي سمعنا عنهم أنهم معتقلين لسه ضايلين جوا (معتقلين)، من اللي بطلعوا زي هيك الأسرى كنا نسألهم ايش فلان كاين، يقولولنا في لسه (للآن) موجودين، اللي هو أولاد عمك لسه جوا (السجن) وإن شاء الله بطلعوا..
إن شاء الله، بلّغ الأهل، انت جيت النا بتحكي إنكم بدكم تطمنوا الأهل إنه هو ما زال على قيد الحياة، أحكيلهم بيشوفك الآن.
بدنا نقلهم (نخبرهم)، لكن احنا إن شاء الله بإذن الله تعالى هو هلقيت (الآن) رامي بخير إن شاء الله بإذن الله، لكن إن شاء الله وقتيش تتوفر وسيلة اتصال بنبلّغهم برضه باتصال على أساس يكلموهم إن شاء الله يكون أفضل، مانت عارف هان وسيلة الاتصال هان (هنا) صعبة جدًا هان (هنا) مابين غزة وما بين رفح (منطقة في قطاع غزة)، صعبة جدًا يعني احنا النا هلقيت أربعة أيام بنحاول نتصل على مرته (زوجته) وعلى أولاده ما بنقدر نوصلهم بالاتصال لأنه صعب الاتصال أكثر من هان (هنا)
في القطاع مرته (زوجته) وأولاده، ذكرتني، ايش بدك تحكي "يسأل الشاب الذي خرج من الاعتقال"
بعدين بعد إذنك حاجة وحدة احنا طول فترة الاعتقال أصلًا كنا معصوبي الأعين لحد آخر لحظة في معبر كرم أبو سالم قاموا (أزالوا) عنا غطاء الأعين، يعني فتحنا أعيننا بمعبر كرم أبو سالم، في الشمس، شفنا الشمس من تاريخ 12.6.. من يوم ما اتمكست (اُعتقلت) لحتى اليوم اللي نزلونا عند كرم أبو سالم أنا فكوا عنا العينين (غطاء العين)، طبعا الإيدين كانو بكلبشات، أول اشي كل إيدينا كانوا بكلبشات واحنا داخل الاعتقال، داخل السجن، كنا مغميين (معصوبي الأعين) ومكلبشين (مربوطي اليدين).
كيف كنتو تعدوا الأيام؟ وبدي اسألك بصراحة ايش اليوم التاريخ؟ ايش اليوم؟
شو اليوم؟
اليوم في أيام الأسبوع ايش هو؟
من أي ناحية ايش اليوم؟
بسألك ايش اليوم تعرف ايش اليوم؟
قصدك التاريخ؟
اليوم الأحد الاثنين الثلاثاء الأربعاء؟
اليوم باعرفش (لا أعلم)، بس أنا بعرف إنه اليوم 2 الشهر. كيف اعرف انه اليوم الشهر؟ علشان أنا كنت أعد اليوم بيومه، اليوم أعده بيومه..
وبالتالي جلست كل هاي الفترة؟
طول هذه الفترة انا من ستة الشهر لسبعة الشهر عندي سنة، من تاريخ 12.6 لتاريخ 12.7 سنة هادي (هذه)، لأني أنا صحيت فيها ثلاثة أيام، كيف صحيت فيها ثلاثة أيام؟ من كتر العذاب..
يا الله، طيب حكالي عن زوجتك وولادك، ايش الوضع عنهم؟
والله أنا لحتى اليوم ما تواصلت معهم، بس هم ولاد عمي كاينين متواصلين معاهم، بيقولولي كلهم بخير وأمورهم تمام، هلقيت بدي أحاول قدر الإمكان إني أتواصل معاهم..
إن شاءا لله بترجعلهم، وانت مشتاقلهم؟!
اه والله والحج خصوصًا الحج والحجة (والده ووالدته)، أقسم بالله مشتاق لهم كثير كثير كثير، أبوي رجل مسن ومعاه مرض هشاشة عظام وأنا للأمانة مشتاقله كتير كتير كتير، والحجة والله أقسم بالله مشتاق أشوفها، لحتى الآن مخيلتها في عينيا مش قادر، مش عارف ايش اللي صار معاهم، وبعدين أنا الوحيد اللي هان الي كنت الهم معيل..
ان شاءالله بترجع لهم
الحمدلله على كل حال
شكرا جزيلا الك رامي أبو راس أحد هؤلاء الذين تم إطلاق سراحهم من قبل جيش الاحتلال الإسرائيلي من خلال موقع كرم أبو سالم العسكري وهي دفعات من هؤلاء الاسرى الذين يتم إفراج الاحتلال عنهم خلال الفترات الماضية وصولًا إلى هذا اليوم..
