شهادة عيشة أحمد من مخيم جباليا

هذه شهادة خاصة لموقع حكايا غزة من السيدة عيشة أحمد من سكان مخيم جباليا حول نزوحها المتكرر من شمال قطاع غزة إلى جنوبه في رفح، واستشهاد زوجها وإصابة ابنها عهد إصابة بليغة أدت به إلى الشلل بسبب قذائف الاحتلال، وهذا نقل لشهادتها كما وردت:

عيشة: أنا عيشة رمضان حسن، أنا من دار شعبان ومتجوزة من عند دار أحمد، احنا في 6/11.. 6/11.. لحد 6/11، من يوم ما بدت الحرب في 7 أكتوبر لحد 6/11، واحنا قاعدين في بيتنا صامدين مرابطين في بيتنا.. كانوا عنّا الناس نازحين، كانت بنتي وولادها وجوزها وكان ابني وبناته وجوزه، وكان أسلافي موجودين معي في قلب الدار نازحين، واحنا بناكل وبنشرب ومبسوطين لحد 6/11

في يوم 6/11 بعد صلاة الظهر اليوم المشئوم، بدت الدبابات الاسرائيلية تخبط علينا قذائف واحنا في قلب دارنا في قلب حارتنا.. صرنا وين نروح؟ وين نروح؟ قال جوزي: اطلعوا في دار جيرانّا لانه دارنا احنا زينك (مصنوع من الصفيح) و اسبست (مادة تستخدم في البناء)، تقريباً دارنا انهالت (انهارت) كليّاً، طلعنا ع دار جيرانّا، وقفنا في الحوش تبع دار جيرانّا في الوقت اللي خبطوا أول قذيفة احنا طلعنا من دار جيرانّا، تاني قذيفة، تالت قذيفة ابني كان بيسكّر باب دارنا اجته في رقبته شظيّة رمته على الأرض، في نفس الوقت اجا لجوزي شظية خبطته في راسه من ورا، جوزي ارتمى ع المطرح، جوزي صار دمه ينعف (ينزف) بين ايديّ وانا اصوت واقول يا يوسف يا يوسف (تبكي) يوسف رد عليّ يوسف استشهد..

كان جوزي ابو عهد استشهد بين ايديّا، دمّه بينعف بين ايديّا مش عارفه ايش اسويله انا .. اتصوري لمّا جوزك بين ايديكي يموت ودمّه بينعف تحمليه وتحطي راسك .. ايدك تحت دم جوزك وجوزك فارق الحياة كليّاً .. في الوقت اللي انا قاعد بزعّق على جوزي يا يوسف يوسف رد عليّا، كان ابني مصاب برّه الحارة، وابني التاني برّه الحارة، وابني التالت برضه اجته شظايا خرجوه بره الحارة في الوقت اللي انا خلاص اتيقنت جوزي استشهد صرت ازعّق يوسف يوسف رد عليّ يوسف رد عليّااااا يا يوسف مش عاد يرد عليّا ..

استشهد جوزي في دقيقة.. التمّوا الناس عليّا واخدوا جوزي.. اجوني يقولولي كمان عهد، اقولّهم عهد ايش ماله، بيقولولي عهد كمان استشهد، صرت اصيّح اقول يا رب اتنين اتنين، والدار خربوا في نفس الوقت يا رب دارنا زينك واسبست اجتها شظايا دبّتها. اللي هو حمّلوا أبو عهد على المستشفى وجابولي اياه شهيد، اشويه طب وين عهد صاروا يقولولي شهيد اللي يقوللي مش شهيد ودّوه على المستشفى كمال عدوان، 10 دكاترة قالوا هذا شهيد شهيد شهيد شهيد، الله رزقه في دكتورة من غاد قالت لأ هذا الشاب هاتولي ايّاه، هذا الشاب مش شهيد، هذا الشاب في نبض لازم يتحول الاندونيسي .. حوّلوه على الاندونيسي قعد عملية ساعتين ونص في العملية طلع 4 ايام في العناية المركّزة ..

في العناية المركّزة طلع 4 ايام صار الولد عنده يطلع الدود من الجرح تبعه عشان مفشّي تعقيم ولا في عناية ولا في اشي للدكاترة صار الولد يطلع دود من رقبته .. انهجموا الدكاترة عليه ايش مالك ايش مالك قالهم لؤي تعالوا شوفوا، ابني .. اخوي بدّوا يموت اخوي الدود بيطلع من جرحه .. التمّوا عليه الدكاترة كلهم صاروا يغيّروله .. الحين انا جوزي استشهد وابني جريح، ابني .. ابني صار مقعد ابني انا قاعد على كرّوسة (كرسي متحرك) ابني ايده اليمين فقدها كليّاً ابني التوازن تبعه فقده كليّاً، اطلعنا من دارنا في 6/11 بعد ما استشهد جوزي وابني في المستشفى اضطريت اطلع من الدار لان دارنا خربت كلّياً لا تصلح للحياة، لا تصلح للسكن، اخدنا سلفي عنده قعدنا 13 يوم ..

في ال13 يوم اليوم ال13 يوم صارت القذائف من الدبابات كمان مرّه تُرمى علينا واحنا في دار سلفي صارت الدار على التالت تموج موج زي موج البحر والقذائف تخبط تخبط تخبط تخبط، قال سلفي لازم تطلعوا من الدار، اطلعنا من الدار نجري كمان مرّه هاي تالت مرّه انا بطلع من الدار اطلعت من الدار رحت على المشروع (مشروع بيت لاهيا) لعند دار بنت عمّي قعدت يومين .. في اليوم التالت برضه نفس القصة صار القذائف تخبط على المشروع عند كمال عدوان، قال ابن سلفي لازم احنا نطلع من هاد الدار والّا جميعاً كلنا بنموت، طلعنا من الدار ضلّينا نمشي من من من المشروع من عند ابو جديان لحديد اول الجرن واحنا عهد يزق هاي ع الكرّوسة عهد يزق لهاي الكرّوسة واحنا نجري ورا بعض واحنا نجري ورا بعض نجري نجري مش عارفين وين نصل ..

ضلينا نجري نجري نجري نجري لمّا وصلنا وين، وصلنا اخر الجرن لقونا سيارات بيقولنا وين واحنا نطلع على الوسطى احنا خايفين نطلع على الوسطى ركبونا في الباصات ونزلونا، ونزلنا عند هاذا الممر الامن اللي عملوه اليهود، والله يكفيكي شر اللي شفنا في الممر الآمن، 4 ساعات، 4 ساعات واحنا قوم واقعد اقعد وقوم طلع هويتك نزّل هويتك حط ايدك على اليمين حط ايدك على الشمال بعدين خش واحد 4 ساعات واحنا مرة اقف مرة اقعد مرة اقف مرة اقعد مرة اقف مرة اقعد وكل شوي اطلق نار اطلق نار اطلق نار اطلق نار مرّينا من الممر الأمامي الحمدلله وطلعنا بسلام احنا وولادنا والحمدلله عهد طلع على الكرّوسة طلع من الممر الآمن رحنا على النصيرات ع دار نسايبنا الله يخلف عليهم، قعدنا عندهم شهر ..

صار ابني هالحين بدّه غيار بدّه علاج، بدّه حاجه طبعاً حصار طبعاً نيله طبعاً حرب لا عارف اجيب اكل لابني ولا عارف اجيب ولا معايا فلوس اجيب اكل لابني لانه انا جوزي استشهد وابني جريح، طلعنا باواعينا والله طلعنا باواعينا الصيفيّات ما معانا اواعي نتدّفى ولا نتنيل كانت الدنيا برد وسرقة، خشت الشتاء واحنا في الشوارع ضلّلينا في دار نسايبنا شهر بالكمال، هالحين قالوا بدهم يخشّوا وين .. ع البريج من صلاح الدين  .. قلنا لازم نطلع من صلاح الدين لازم نطلع من الأبراج قبل ما يخشّوا صلاح الدين ..

اطلعنا من الابراج ع رفح وهايّا احنا إلنا شهر و4 ايام في رفح في معاناة بين خيام ورمل ووسخ ونقل ميّه حلوة ونقل ميّه مالحة وحطب ونار ووسخ وقرف وعايشين الله اعلم كيف حياتنا، لا ميّه نظيفة ولا اكل نظيف ولا اكل معقّم ولا حياة ولا حياة ولا حياة زي الخلق، حياة يمكن الحيوانات انظف من الحيوانات اللي بيعيشوا أهل غزة في رفح، لأنه عايشين كلهم على الوسخ وعلى القرف وعايشين لا بيئة نظيفة ولا ميّه نظيفة ولا اكل نظيف عايشين على المعلبات صار معانا نقرس صار معانا رجلين مش قادرين نقف عليهم من كتر ما بناكل معلبات صرنا عايشين على المعلبات، وهاي حياتنا ومأساتنا،  بدكوا تصوّروا تعالوا صوّروا المأساة شوفوها، شوفوا كيف عايشين الشعب، صوّروا الميّه صوّروا المجاري، صوّروا صوّروا البيئة اللي عايش فيها شعب غزة، صوروها تعالوا شوفوها تعالوا شوفوها اذا بترضيكوا اذا بترضي العالم كلّه، الحمدلله رب العالمين احنا ما بنقول غير الحمدلله رب العالمين، جوزي استشهد وابني هيّوه شبه معاق لكن انا لسّه بقول الحمد لله رب العالمين، الحمدلله رب العالمين والحمدلله رب العالمين.

الصحافية: طب خالتي وين شايفة البلد رايحة؟

عيشة: ان شاء الله ان شاء الله عند الله .. عند الله كل شئ عند الله احنا ما بنعرف غير رب العالمين، ان شاء الله تكون للخير مش بايدينا والله ان شاالله تكون بالخير ان شاء الله تكون بالخير يعني احنا لا سمح الله يعني كنّا عارفين هاد بيصير فينا، والله ما عارفين ولا عارفين هنوصّل لها المواصيل، ونقول ربنا ان شاء الله ربنا يغيّر ها الحال ويبدل احسن منّه وتخلّص الحرب ونرجع على دورنا في الشمال، ملناش دور في الشمال لكن إلنا الله وإلنا مطرح، دارنا بنحط خيمة وبنعيش فيها على الاقل ميّه نظيفة هوا نظيف، هان لا فيه ميّه نظيفة ولا في هوا نظيف ولا في.. ميكروبات جراثيم ووسخ وقرف، صوّري صوّري صوّري الأرض كيف طينة، صوّري الناس اللي مش عارفة تمشي في الطينة، صوّري الميّه الملوّثة اللي احنا بنشربها، صوّري الاكل اللي احنا بنصوّره (تقصد نأكله)، صوّري الرمل اللي احنا عايشين عليه.

الصحافية: طب بالنسبة لابنك الجريح بياكل أكل معين؟

عيشة: ابني عايش زي ما بنعيش والله زينا زيّه ايش ما ناكل بنطعمه، بناكل فول حمص فاصوليا بازلا، المعلبات اللي بتطلع بنطعمها لابني.. ليش ابني لازمله غذاء،  لأنه ابني رقبته كل هذه انشلعت هاي كلها شلع (تشير على جانب رقبتها بأكمله)، ابني شهرين واحنا لسّه بنغيّر له غيارات فش ال.. ال.. الزور (تشير لرقبتها) هذا الأبيض كان مبيّن.. ابني، ابني صار الحين عنده ارتجاج في المخ معندوش توازن في الح... معندوش توازن في جسمه نهائي.. بدّه حدا يمسكه من ورا ويمسكه من قدام عشان بس يقوم خطوتين يمشي فيها.. احنا عملناله تحويله، لليوم التحويلة مااا استنظفوا يشوفوها، إلها الحين شهر، وروحنا ع الأوروبي والله اعلم ايش اخوه عانى لمّا طلّعله التحويلة ولليوم ما مضوا على التحويلة انه يطلع يتعالج بالخارج..

يعني احنا بنطالب في حدا يسرّع في التحويلة انا ابني كل ما ناب (كلما مر الوقت) بيرجع لورا، صوّريه صوّريه ابني كل ما ناب وضعه بيرجع لورا ابني، كل ما ناب بيرجع لورا مفشّي تقدم في صحته بالمرّه، فشّي مبينامش طول الليل، ما بينامش، والله الحارة بيقول: احنا ونصحى على صوت عهد يصرخ الجريح اللي عندكم، ايش بدّي اقولك عليه، بدّي اقولك عن شعب غزة ايش شاف شعب غزة ايش شاف من الدبابات شاف من القذائف، هذي القذائف لا بترحم ولا بتعرف حدا.. بتتطّاير شظايا، يعني القذيفة الواحدة مستعدة تموّت 50 – 70 نفر الشظايا.. القذائف بتصير شظايا والشظايا بتموتك، انا جوزي اجت شظية في رأسه من هان، شظية اللي موتته صارت عنده نزيف في المخ في دقيقة اتصوّري لمّا جوزك بين ايديكي وكلّه دم بينعف وانتي بتصرخي وبتصوّتي ومش عارفة تعمليله ولا حاجة، والله القلب الكافر بيصيّح ع اللي شفناه، القلب الكافر بيصيّح ع اللي شفناه، والحمدلله رب العالمين.

الصحافية: ايش رسالتك للعالم؟

عيشة: رسالتي للعالم تعالوا شوفوا أهل غزة تعالوا شوفوا أهل غزة كيف عايشين، تعالوا شوفوا المأساة اللي عايشها أهل غزة، تعالوا شوفوا المعاناة اللي عايشها أهل غزة، لا ميّة نظيفة ولا بيئة نظيفة ولا أكل نظيف ولا حياة نظيفة، رمل حطب احنا.. الحطب اللي بنشتريه قلع عينينا واحنا بنولع فيه النار مفيش احنا عايشين ع الحطب بنعاني من شيلة الحطب.. والله هدتنا من شيلة الحطب، اشتري حطب اشتري حطب اشتري حطب.. قلعت عينينا تولّع النار قلّعت عينينا.. والله يا خالتي بنّام والرمل في تمامنا (فمّنا) والله بنّام والرمل في تمامنا.. بتحسّي انك بتاكلي رمل.. أنا غير عهد عندي كمان محمد، أنا عندي محمد إله 3 سنين نايم على ظهره، محمد عنده كدمة على النخاع الشوكي و3 سنين محمد لسّه الله لطف فيه جديد، يعني غير عهد كمان أنا عندي محمد.. عنده كدمة على النخاع الشوكي صار عنده شلل ورب العالمين نجّاه، يعني انا عندي 2 معنديش واحد، والحمدلله ايش بدّي اقول غير هيك.

الصحافية: الله يفرجها

عيشة: الله يستر علينا ويفرجها علينا ها الحرب ويخلص ها الحرب ونروح لبلادنا يا رب ونرجّع لدورنا، فشّ عنّا دور لكن إلنا بنحط خيمة وبنقعد في دارنا.. بنعيش في بيتنا.. الحمدلله.

الصحافية: يعطيكي العافية.

عيشة: حبيبتي الله يرضى عليكي سامحيني اذا انا تقّلتك.

الوسوم