هذه شهادة جمال مصبح الذي يعمل في بيع الأخشاب في مدينة رفح بعد نزوحه من الشجاعية شمال قطاع غزة، نقلتها قناة الجزيرة مباشر في تاريخ 18 يناير 2024، وهذا نقل لشهادته كما ورد:
طبعا احنا نازحين من غزة، للأسف مافي حد يقف معانا كشعب غلبان، حتى خيم مش موجود، فاضطرينا احنا، كإنسان مواطن من غزة اجيب خشب وأبيعه للناس اللي نازحين زيي بأسعار بسيطة، احنا نازحين مافش اشي، أي مأوى غير إنه يكون عنا خيمة، والخيمة هاي مش متوفرة، لأنه اليهود مانعين المعبر يدخّل أي خيم، فاضطرت الناس تشتري خشب وتعمل خيم، والخيم مكلفة أقل خيمة بتكلف 1000 شيكل. المواطن الغزي اللي روّح وساب بيته وكل فلوسه الآن مش قادر يعمل خيمة بـ 1000 شيكل. الخشب غالي فالإنسان المواطن الغلبان الله يكون معينه الله يعينه فالوضع شعب ونسأل الله انه يعينا جميعا على تحمل هالهم اللي احنا فيه لغاية ما نرجع سالمين غانمين، وربنا يسلم، وفي النهاية كله فدى فلسطين، وبيعوضنا الله بدل أراضينا واللي راح وكل بيوتنا.
ثم يظهر في الفيديو الأسرة التي صنعها ويقول:
تخوت (أسرّة) للجرحى والمرضى عشان ما يناموش على التراب، ويعلم الله بحق خشب يعني مصنعيته بتكلفنا فوق الـ 200 شيكل خشب، خشبة كنت بـ 10 شيكل اليوم المواطن بياخذها بـ 40 شيكل، عبء على المواطن كان الله بعونهم، والله في ناس ما معهم فلوس، الله يعلم في مرضى بنعمل لهم سراير قاعدين المريض عشان نعمل له سرير زي هذا بكلفه 200 شيكل، كان الله بعون الناس والله يعينا ويعين المواطنين على تحمل أعباء المصاريف، ربنا أعلم انه في ناس اجت ما عندها حق الخشب لكن حاولنا بقدر المستطاع نساعد بما يرضي الله، أكتر من شخص اجا قال لمريض لأولاد شهداء لبنات لمش عارف ايش، فاحنا بقدر الإمكان بنساعد، ونسأل الله انه يكون عوننا جميعا وعون جميع سكان فلسطين. لما نزحوا من المغازي كتير، لما نزح من النصيرات كتير، لما نزح من البريج كتير، فعندك كل يوم ما يعادل، أنا من عندي بيجي ياخد، بديش أقول لك 100 شخص، كل يوم هذا، أنا كواحد من هنا قاعد بساعد الناس في اني اعمل لهم سراير اعمل لهم طبليات عجين، أعمل لهم قعدات، فهذا يعني من باب المساعدة وإني مامدش إيدي لكوبونة (مساعدات) أو أي شيء.
العالم الخارجي ظالم ظالم ظالم، سنقتص منهم في الآخرة لأنه الآن احنا مش قادرين نقتص منهم لأننا ضعفاء لا نمتلك إلا نقول حسبنا الله ونعم الوكيل. احنا بدنا وقفة رجل مع أهل غزة، مع أهل فلسطين اللي تذبّحوا يوميا 200 شهيد، الآن شهدائنا فوق الـ 40 ألف شهيد حسبنا الله ونعم الوكيل، هم مش خسارة في فلسطين، لو 100 ألف شهيد مش خسارة في شعبنا، من أجل فلسطين مش خسارة.
رسالتي لنتنياهو وغالانت وغيره لن تستطيعوا أن تمحوا أهل فلسطين من أرضهم، وسيأتي اليوم الذي نخرجكم من أرضنا كما اخرجتمونا، والله الذي لا إله إلا هو كما اعتقلتونا لازم نعتقلكم، والآن عنا مختطفين لن نتركهم إلا لما تتركوا مختطفينا وأسرانا، هذه رسالة لنتنياهو والله لن نترك واحد إلا لما تترك كل أسرانا الوطن أو الموت، لازم أرجع عندي يقين بالله اني ارجع، وأخذ كل فلسطين والله 67 لن أرضى بها “يشير إلى حل الدولتين” والله 48 لن أرضى بها “يشير إلى حدود دولة الكيان التي حددتها الأمم المتحدة عام 1948”. والله غير يرحلوا من بلادنا صاغرين.
